Sunday, June 14, 2009

نصيحه للشباب الي بيشتغل

الشغل في اي حته فيكي يا مصر يخضع لقانون واحد بس .. قانون صاحب المال او قانون صاحب الشأن (في حاله الشركات ذات الجنسيات المتعدده و الباشا هو العضو المنتدب) ، حتقولي ازاي ده فيه قانون عمل و تأمين اجتماعي و ضرايب .. حقولك ده موجود فقط حفظا لحق الحكومه و بس ..  يعني لو صاحب الشغل اصدر اي قرار- من وجهه نظرتك الي مش مهمه تماما-  صح او غلط .. حق او باطل .. قانوني او غير قانوني .. حضرتك مفيش في ايدك حاجه تعملها .. المشكله بقي انك لو اعترضت او أبديت رأيك المخالف لرأي "الباشا" ، كده ممكن يحصلك حاجه من 3:

1-تتحط في البلاك ليست و اصبحت من المغضوب عليهم ..  خطواتك بقت محسوبه و ايامك معدوده

2-تنال لقب "المشاغب بتاع المشاكل" و ابقي قابلني لو اترقيت او خدت زيادتك السنويه حتي!

3-حد فيكو "يتهور" و النتيجه الحتميه الاستماره السداسيه

طب واحد محترم زيك يقعد في مكان مقرف كده ليه .. الي رماك علي المر؟ .. والله لقيت مكان احسن اتفضل روحه .. ملقتش يبقي تبلع لسانك و المبادئ علشان ده أكل عيش .. علشان كده تلاقي الturn over عالي بين شباب الرجاله بالذات .. المنصب و التقدم الوظيفي مبقاش مضمون يبقي نخلينا في الي بيدفع اكتر .. فلوس اكتر دلوقتي اضمن من بناء مستقبل وظيفي افتراضي.

يا سلام بقي لو جالك عقد عمل في الخليج .. فلوس كويسه و عربيه هوندا أكورد .. حر فظيع بس البلد كلها مكيفه ..  عيشه نضيفه و باسبورك مع الكفيل .. تستحمل كام سنه هناك علشان ترجع مصر تفتح مشروع و تبقي صاحب مال و تعمل الي انت عايزه .. طلع كلاكيعك بقي زي منتا عايز .. فقد عبرت للجبهه الاخري  حيث تتحول رغباتك و أراءك الي قوانين و لوائح.

 

1 comment:

اسماعيل محمد said...

ولهذا فأنا أنصح الشباب بالعمل الحر ، ولا أتخيل نفسي موظف أبدا ، لن استطيع التغاضي ابدا عن خطأ أو شيء لا يعجبني .. ولهذا أنا زاهد في هذه الحياة وأرضى بأي عمل حر شريف حتى لو بعت المناديل المعطرة عند إشارات المرور